මගේ ලිපි අංක 15 - Netflix ගැන සිංහලෙන් Netflix in Sinhala

මොකක්ද මේ Netflix?

සරලවම කිව්වොත් Netflix කියන්නේ අපි කැමති ෆිල්ම්, ටීවී සීරීස්, ඩ්‍රාමා එහෙම බල්න්න පුලුවන් ඔන්ලයින් වෙබ් සයිට් එකක්. අපිට මේ පහසුකම ලබාගන්න අපි යම් මුදලක් ගෙවලා මුලින්ම ඒකේ මෙම්බර් කෙනෙක් වෙන්න ඕන. ස්මාර්ට් ටීවී එකෙන්, ලැප් එකකින්, ඩෙස්ක්ටොප් එකකින් එහෙමත් නැත්නම් ෆෝන් එකෙන් මේ පහසුකම් අත්විදින්න පුලුවන්.

මොනවද මේකේ තියෙන්නේ?

සම්මාන දිනපු ෆිල්ම්, ඩ්‍රාමා, ඩොකියුමන්ට්‍රීස්, කාටූන් ආදී මෙකී කී නොකී හැම එකක්ම මේකෙ තියනවා. ඒවාත් එක එක විදියට කැටගරි කරලා ලස්සනට තියෙනවා අපිට තෝරගන්න පුලුවන් විදියට. පහල තියෙන පින්තූරෙ බලන්නකො.

නෙට්ෆ්ලික්ස් ෆිල්ම් කැටගරි

ඒ විතරක් නෙමෙයි. අපිට මේකෙ එකවුන්ට් එක කිඩ්ස් විදියටත් පාලනය කරන්න පුලුවන්, එතකොට කට කන සීන් වගේ එවුවා නැතිව බය නැතුව තමන්ගෙ පොඩි එකාට ෆිල්ම් එකක් දාලා දීලා පාඩුවේ ඉන්න පුලුවන්.

අනිත් එක තමයි අපිට ෆිල්ම් එකක් ඩවුන්ලෝඩ් කරන් ඕෆ්ලයින් වෙලා බලන්නත් පුලුවන්. හැබැයි දවස් 30ක් විතරයි තියාගන්න පුලුවන්.

ඩේටා කැපෙන විදිය ගැන බැලුවම එක පැයක් බලන්න ‍මෙගා බයිට් 600 ක් වගේ තමයි ඇවරේජ් යන්නේ.කොලිටිය ගැන කියලා වැඩක් නෑ.

කොච්චර ගෙවන්න ඕනද?

ගෙවීම් කරන්න තියෙන්නෙ තමන් තෝරගන්න ප්ලෑන් එක අනුව. පහල දාලා තියෙන්නෙ ශ්‍රී ලංකාවේ මං පාවිච්චි කරන එකවුන්ට් එකේ විස්තර. මාසෙකට ඩොලර් 9.99 ගෙවන්න තියන එක තමයි මං පාවිච්චි කරන්නේ ඒකට ලංකා රුපියල් 1906.51ක් කැපිලා තිබුනා (30/03/2020) දිනට.සෑහෙන්න කාලයක් ඩොලර් 7.99 පැකේජ් එක් පාවිච්චි කරලා තමයි මං අනිත් එකට අප්ග්‍රේඩ් උනේ.

මේ කර්ෆිව් එක අස්සේ ෆිල්ම් එකක් බලන් පාඩුවේ ඉන්න පුලුවන් නිසා ඒ ගානට මටනම් කිසිම පාඩුවක් නෑ. තෝරගන්න තියෙන ෆිල්ම් ගොඩයි කොලිටි එකයි බැලුවම කිසිම පාඩුවක් නෑ. අනිත් එක මං ඩිවයිස් 4 ක එකම එකවුන්ට් එකකින් යූස් කරනවා.

නෙට්ෆ්ලික්ස් එක ලංකාවේ ඩයලොග් එකත් එක්ක එකතු වෙලා පේමන්ට් කරන්න පුලුවන් මෙතඩ් එකක් තියනවා. හැබැයි ගෙගාබයිට් 5ක් විතරයි අපිට ෆ්රී දෙන්නේ එතනින් එහාට පාවිව්වි කරන ඩේටා වලට චාජ් වෙනවා. මං පේමන්ට් එක කලේ මගේ නෝමල් කොමර්ෂල් බැංකු ඩෙබිට් කාඩ් එකකින් නිසා කිසිම සීමාවක් නැතිව නෙට්ෆ්ලික්ස් යූස් කරන්න පුලුවන්.

වෙන රටවල්වලට නෙට්ෆ්ලික්ස් නොමිලේම මාසයක් ලබාගන්න පුලුවන්.ඒත් ලංකාවේ අයියලගේ වැඩ නිසා ඒ චාන්ස් එක අපේ රටට ලබාගන්න බැහැ.

මගේ ලිපි අංක 14 - උපාධි කඩ.....

උපාධි කඩ.....

උපුටා ගැනීම නුමේෂ් ඩිලූෂ සොයුරාගේ බුකි පිටුවෙන්

අන්තරේ, පෙරටුගාමී, සමාජවාදී ශිෂ්‍ය බල මණ්ඩල ආදී එකී නොකී අදාළ සංවිධාන වල සංවිධායක සහෝදර සහෝදරියන් වෙත,

ප්‍රමිතියක් නැති උපාධිධාරීන් තනන යම් ආයතනයක් වේ නම් ඒ සදහා විරුද්ධ වූවෙමි, අදද ඒ සදහා විරුද්ධ වෙමි, හෙටද ඒ සදහා විරුද්ධ වන්නෙමි. සාමකාමී උද්ඝෝෂණ ව්‍යාපාර සැමගේ අයිතිවාසිකමකි. එය නුබත්, මාත් පිළිගන්නා කරුණකි. නමුත් නුබලාට අමතක වූ එක් කාරණාවක් ඇත. එනම් සැමට ලබාගත හැකි අධ්‍යාපනයයි. අයන්න ආයන්න කියා නුූඹලා සමග එකට පාසලට එක්වූ සහෝදර සහෝදරියන් ගැන මදක් සිහිකර බලන්න. පිළිවෙලින් ශිෂ්‍යත්ව කඩයිම, සාමාන්‍ය පෙළ, උසස් පෙළ ආදී කඩයිම් පසුකරන විට නුඹ සමග ඔවුන් සිටියාද? එක බත්පත පොරකා කා, එකට පිටියට පැන ගුටි පන්දු ගැසූ, ක්‍රිකට් ගැසූ නුබේ පැරණි මිතුරන් අද නුඹ ළගද? සමහර විට එකට ගුරුවරුන්ගෙන් ගුටිකා, එක ළගට වී දණ ගසා සිටි අතීතයේ නුබේ හොදම මිතුරන් අද කොහිද? සා/පෙළ , හා උ/පෙළ පසු කරමින් සරසවි දොරටුවෙන් ඇතුලත් වූ පසු නුබලා සමග පැමිණි නැති උන් ගැන නුබලා විපරම් කලේද? නැත. සැවොම කාලයත් සමග තරගයක යෙදී සිටී. එදා නුඹ ළග සිටි මිතුරා අද සමීපව නැත. අද ළගම සිටින්නේ සරසවි දොරටුවෙන් ඇතුලට ආ පසු හමුවූ නව මිතුරා පමණි. නුබලාගේ අතීත මිතුරන් සා/පෙළ හා උ/පෙළ කඩයිම් වලින් හැලී ගොස් ඇත.

අදාළ කඩයිම් විභාග නුබලා තරම් හොදින් කර ගැනීමට අසමත් වූ ඔවුන් කුමක් කළ යුතුද? පියා අදයට කළ කුඹුර ඔහුත් කළ යුතුද? පියා නැති ඇයව ජීවත් කරවූ ඇගේ මව මෙන් ඇයත් තේ දලු නෙළීමට යා යුතුද? ඔහුගේ පියාගේ රැකියාව වූ වැළි ගොඩ දැමීම ඔහුගේත් අනාගත රැකියාව වි යුතුද? පෙදරේරු රස්සාවෙන් මුලු පවුලේම සා ගින්දර නිවූ ඔහුගේ පියාගේ අඩි පාරේ ඔහුත් ගමන් කළ යුතුද? තම සවිය ගාමන්ටුවේ මහන මැසිමට වැය කළ ඇයගේ මව මෙන් ඇයත් සන්නාලියක විය යුතුද? රජයේ රැකියාවක් කරන ඔහුගේ පියා තරම් අධ්‍යාපණ සුදුසුකම් ලබාගැනීමට නොහැකි වූ නිසා ඔහු තම ජීවිතය ගෙන යාමට ගඩා ගෙඩි කැඩිය යුතුද? නැතහොත් ඔවුන් සොරකම්කොට, මිනීමරා හෝ යම් අන් ක්‍රමයක් සොයා ගත යුතුව ඇද්ද? නුබලාගේ ලොජික්වලට අනුකූලව නම් සරසවි යාමට නොහැකි වූ අටපාස් නොමැති උදවිය සමාජවාදී ආර්ථික ක්‍රමයක් පැමිණ, උ/පෙළ සමත්වූ සියලු සිසුන්හට සරසවි යාමට හැකිවන දා තෙක් ඉහත සදහන් ක්‍රමයකට මුදල් ඉපයිය යුතුය.

කොළඹට ආ නුබලාගේ අත තිබුනේ අදාළ වෛද්‍ය ආයතනය අහෝසි කළ යුතු යැයි රජයට බලකරන පුවරු පමණක්ම නොවේ. IESL, කොතලාවල, NSBM ආදී උපාධි කඩ අහෝසි කරනු යන්නත් පැහැදිළිව දැක්වුනු සටන් පාඨ විය. පැහැදිලිව එය බංකොලෛාත්, හිරිකිත දේශපාලනික නුබලාගේ තනි මතය බව පැහැදිලි වේ. සමස්ථ විශ්වවිද්‍යාල ප්‍රජාවටම පෞද්ගලික විශ්වවිද්‍යාල පිළිබදව ගැටලුවක් නොමැත. ඔවුන් සියලු දෙනාම කොළඹට එක් රැස් වූයේ අදාළ ආයතනය සම්බන්ධයෙන් රජයට බලකිරීමටය නමුදු සිදුවූයේ නුබලාගේ හුදු දේශපාලනික උවමනා එපාකම් වෙනුවෙන් බොරදියේ මාලු බෑමක නිරත වීමටය. නැතහොත් දේශපාලනික වශයෙන් එක ගලෙන් කුරුල්ලන් දෙතුන් දෙනෙකු බිම දැමීමටය. නුබලාට අනුව එසේ සිදුවනතෙක් අට පාස් නැති අප බලා සිටිය යුුතුද?

රජයේ විශ්වවිද්‍යාල වලට ඉඩ පහසුකම් නොමැතිව බදවා ගැනීමට නොහැකි වූ කරුණ පමණක් නිසාම අප අපගේ ජීවිත කාළකණ්නි කර ගත යුතුද? අපටම කියා සැබෑ කරගැනීමට හීන නොමැතිද? එවන් හීන දැකීමට ඉඩ, අයිතිය ඇත්තේ නුබලාටම පමණක්ද? වයසට ගිය කලක තම මව්පියන් සතුටින් තැබීමට, තමාටම කියා වාහනයක් මිළට ගැනීමට, ගෙයක් දොරක් සාදා තමාගේ ලෙයින් උපන් දරුවන් හදා වඩා ගැනීමට, මනා රැකියාවක් කිරීමට අප දකිනා එම හීන, රජයේ සරසවියකට නොගිය පමණින් ඒවා අකුලා විනාස කර ගත යුතුද? නැත සොයුරනේ නැත. අපද නුබලා මෙන් එම හීන දැකිය යුතුය, ඒවා සැබෑ කර ගැනීමට විවිධ මංමාවත්වල, විවිධ අධ්‍යාපණ අවස්ථා සොයා පිබඹා යා යුතුය.

උ/පෙළ විභාගය සමත්ව සරසවි ගමන යනතෙක් නුබගෙන් මගහැරුණු යහළුවන් ඇත්තටම මග හැරුණු වෙනත් හේතු නුඹ සොයා බැලුවෙහිද? මගේ මිතුරකුගේ පියා අවසන් ගමන් ගමන් ගියේ ඔහුට උ/පෙළ විභාගයට අවුරුද්දක් පමණ කල් තබාය.  එතෙක් උපකාරක පන්ති වලදී ඔහු දැත්වූ ඉහළ දක්ෂතා නිසා පළමු අවස්ථාවේදීම ඔහු සරසවි පියසට යාවි යැයි සැවොම බලාපොරොත්තු වීමු. නමුත් සිදුවූයේ අනෙකකි. පියා නැති පවුලේ ආර්ථික අහේනිය, තමාගේ මවගේ, සහෝදරියගේ හා සහෝදරියගේ බඩගින්දර පවුලේ වැඩිමලා ලෙස ඔහුට බලා දරා සිටීමට නොහැකි විය. සමාජවාදය ගැන කතාකරන අයියලා කවුරුත් එදා සිටියේ නැත, අදත් එවන් අවස්ථාවකට බෙහෙතකට වත් නැත. සරසවි සිහිනය පසකලූ ඔහු තම සහෝදරියට හෝ සරසවි සිහිනය විවිර කරදීමේ අදිටනින් රැකියාවක් සොයා අධ්‍යාපණ මාර්ගයෙන් බැහැර විය. මෙනක් ආර්ථික අපහසුතා ඇති කොතෙකුත් දක්ෂ මිතුරන් සා/පෙළ කඩයිමට පසු හෝ මෙහා අධ්‍යාපණය හමාර කර, නුබලාට අනුව අට පාස් නොමැති රියදුරකු, පොලිස් කාරයකු, ආමි කාරයකු හෝ ලිපිකරුවකු වී ඇත්ද? මේවා ගැන කතාකිරීම නුබලාගේ සමාජවාදී ක්‍රමයට පටහැනි වන්නේ මන්ද? ලෙඩක් දුකක් සෑදී උ/පෙළ විභාගය ඇනගන්නා දක්ෂම දරුවන් තව නොමැතිද? එසේත් නැත්නම් ඉතා දක්ෂ ලෙස උ/පෙළ සමත්ව Z ලකුනේ ප්‍රශ්න නිසා හා රජයේ විශ්වවිද්‍යාල වලට ඇතුළත් කරගන්නා සීමිත පිරිස නිසාත් සරසවි සිහිනය අකුළා ගන්නා දක්ෂයන්, එක දිස්ත්‍රික්කයකින් AAA ලබාගන්නා සිසුවාට සරසවි වරම් අහිමි වීමත් වෙනත් දිස්ත්‍රික්කයකින් ඊට සාපේක්ෂව අඩු ප්‍රථිපලයක් ලබාගන්නා සිසුවා සරසවි දොරටුව විවර කරගන්නා විට ඒවා තම අයිතිවාසිකම් පමණක් දිනාගන්නා සමාජවාදී යැයි කියාගන්නා නුඹලාගේ සටන් පාඨ වල දක්නට නොලැබීමත් පුදුමයකි.

IESL, NSBM, SLIIT, කොතලාවල ආදිය උපාධි කඩ යැයි නුඹලා නගන සටන් පාඨ ගැන මොහොතක් සිතන්න. එසේනම් නුඹලාගේ තර්ක අනුව ශ්‍රී ලංකා විවෘත විශ්වවිද්‍යාලය එවන් උපාධි කඩයක් නොවන්නේ මන්ද? එය නැතිනම් අයත්වන්නේ නුඹලාගේ කිනම් කැටගරියටද? මා දන්නා අයුරින් විවෘත විශ්වවිද්‍යාලයේ එකදු පාඨමාලාවක් හෝ නොමිලයේ හැදෑරීමට ඉඩ නොමැත. තවද උ/පෙළ අසමතකුට පවා ප්‍රාරම්භක පාඨමාලා සිදුකර සුදුසුකම්ලත් ඉංජිනේරුවරයකු, ගණකාධිකාරීවරයකු හෝ වෛද්‍ය නොවන ඕනෑම රැකියාවක් සිදුකල හැකිය. අවශ්‍ය වන්නේ මුදල් සහ තමාගේ කැපවීම පමණි. ඉහත සදහන් කල සියලු උපාධි කඩවලට වඩා එම උපාධි කඩය පැරණි බවත්, අන් සියලු උපාධි කඩවල තිඹිරිගෙය ශ්‍රී ලංකා විවෘත විශ්වවිද්‍යාලය නමැති ආයතනය බව මා දරන මතය නිවරදි නොවේනම් කරුණාකර මා නිවරදි කරනු මැන. එසේනම් එයටද විරුද්ධව සටන් පාඨ නොනගන්නේ සැමට සාධාරණ සමාජයක් කරා යන නුඹලාගේ සාමාජවාදී පාඨයේ හිඩසක් ඇති නිසාද?

රජයේ ආයතන වලින්ම උසස් අධ්‍යාපණ ඩිප්ලොමා ලබාගන්නා පිරිසද නුඹලාගේ මතයට අනුව අයත් වන්නේ අටපාස් නැති ගොබ්බයන්ට වේ. ඔවුන්ටද උපාධියක් සම්පූර්ණ කරගැනීමට, තවදුරටත් ඉහලට ඉගෙන ගැනීමට පිහිටවන්නේ ඉහත සදහන් උපාධි කඩම වේ. නුඹලා සමාජවාදයේ නාමයෙන් එරෙහි වන්නේද, වසා දැමීමට බල කරන්නනේද එම ආයතන වේ. නුඹලාගේ උපාධියට අමතරව සුදුසුකම් ලබා ගැනීමට යන CIM, CIMA, AAT ආදී ආයතන පවා මුදලට එනම් සා/පෙළ, උ/පෙළ උපකාරක පන්ති මෙන් අධ්‍යාපණය විකුණා දැමුවත් නුඹලා ඒ ගැන වචනයක්වත් කතා නොකරයි. නුඹලාගේ මතය අනුව ඒවා තුල අධ්‍යාපනය විකුනා දමන්නේ නැත. විකුනන්නේ හොද රුකියාවක් කිරීමට විධිමත් අධ්‍යාපනයක් ලබා ගන්නා නුඹගේ සහෝදර සහෝදරියන් ආසාවෙන් ඉගෙන ගන්නා ඉහත ආයතන පමණකි.මේවා අට පාස් නොමැති අපට මහා විහිලු කතන්දර වේ. නුඹලාට අනුව අප කළ යුතු වන්නේ නුඹලා සිහින දකින සමාජවාදී ආණ්ඩුවක් පැමිණි පසු සැමට අධ්‍යාපණය සලසාවී යැයි නෙත් පියන් ඇර ඒ මදිනම් කටද ඇර බලාසිටීමයි. දැන් ඇත්තේ කන්නංගර, ඇතුලත්මුදලි වැනි උගතුන්ගේ නිදහස් අධ්‍යාපන දර්ශනය වෙනුවට නුඹලාගේ වාසියට හරවා ගන්නා හා විකෘති කරන ලද චේ, විජේවීර වැනි වීරවරුන්ගේ දර්ශනයන් පමණි.

ඉහත සදහන් යම් ආයතනයක උපාධි පාඨමාලාවකට ගාස්තු ගෙවීමෙන් පසු උපාධිය නියමිත කාලයේදී නිකම්ම අතට ලැබෙතැයි වැනි නුඹලාගේ විහිලු කියමන් වලට 80% අනිවාර්ය දේශන ශාලාවල වාඩිවී සිටින මගේත්, අටපාස් නැති නමුත් ඉදිරියට ඉගෙන ගැනීමට වෙර දරනා අන් අයගේත් පස්චාත් පෙදෙස් සිනා සෙන අයුරු නුඹලා දන්නවාද? ඒවා තුළ උපාධිය නිකම්ම ලැබෙන්නේ නැත. තමා විසින්ම ඉතා මහන්සියෙන් වැර වෑයමෙන් උපාධිය උපයා ගත යුතුව ඇත. වර්ජන, පිකටින් ආදියට සහභාගී වීමට තබා රූපවාහිනියක්වත් නිදහසේ නැරඹීමට අවකාශ නැත. ඒ තරමටම assignments, coarse work, research, presentation වැහි වැහැලාය. සැමගේම බලාපොරොත්තුව වන්නේ නියමිත කාලයේදී තම උපාධිය සම්පූර්ණ කරගෙන තවත් තමන්ගේ දෙමාපියන්ට බරක් නොවී ඔවුන්ව රැකබලා ස්ථාවර වීමටද, යුතුකම් ඉටුකරගැනීමටද ඉගෙනීමට ගත් බැංකු ණය ගෙවා නිදහසේ සිටීමටය. එබැවින් මේවා සිහිකර ඉහළින් තම අධ්‍යාපණ වැඩ කටයුතු කරගැනීම අටපාස් නොමැති අපගේ පරම ඉලක්කයයි.

අදාළ වෛද්‍ය ආයතනය පෙන්වමින් ගොනා හැරෙන්නේ පොල් පැල සියල්ල කෑමට බව නුඹලාගේ මේ ක්‍රියා පිළිවෙත් නිසා නැවත නැවතත් තහවුරුව ඇත. සමාජවාදය පිළිබද අයන්නවත් නොදත් උන් හට නුඹලා බොරු මායමක් පෙන්වා සහෝදරත්වය නාමයෙන් බළලුන් ලවා කොස් ඇට බා ගන්නා ආකාරය ඇත්තටම පිළිකුල් සහගතය. කොතලාවල, IESL, NSBM, SLIIT ආදී වූ නුඹලා ද්වේශ සහගතව කියන්නා වූ උපාධි කඩවලට විරුද්ධ වීම නුඹලාගේ ඇති කුහකකම යැයි නොකියා අට පාස්වත් නැති අප අන් කෙලෙස ඒ දෙස බලන්නද?

තමාගේ පැරණි මිතුරා ඉගෙන ගන්නා ආයතන දෙස ද්වේශ සහගතව බැලීමට උන්ට පුරුදු පුහුණු කර විස පොවන්නේ නුඹලා බව අපි දනිමු. නුඹලාටද ඒ අසාධාරණ විස පෙව්වේ පවතින තුප්පහි, බංකොලත් දේශපාලන නායකයන් බව දනිමු. ඇත්තේ අනුකම්පාවක් පමණි. නුබලා තවදුරටත් ඉගෙන ගත යුතු නොවේද? අපිදු ඉගෙනීමට ආසාවක්, අකමැත්තක් ඇත්තවුන් නොවේ. නුබ අපි සැම හීන දකින්නාවූ සැමට අධ්‍යාපණයක් ලැබිය හැකි වන සේ ඉඩලැබෙන නුඹලා අද විකෘති කරන නිවරදි සමාජවාදී ක්‍රමය කවදා ලැබෙන්නේද??

සිහින දකින සැවොම මිනිසෙකි. නුඹත් මමත් සිහින දැකිය යුතුය, ඒවා තුළ ගිළී නැහැවී ඒවා සැබෑ කරගැනීමට විරිය වැඩිය යුතුය, පෙරුම් පිරිය යුතුය. මන්දයත් අප දෙදෙනාම මිනිසුන් ලෙස මෙලොව උපත ලැබූ හා මිනිසකු ලෙසම කිසිවකට අයිතිවාසිකමක් නොකියා යම් දවසක මෙලොවින් නික්ම යන නිසාය....

මීට,

නුබලාට අනුව අට පාස් නැති,

රජයේ සරසවියකට යාමට ලකුනු තිබූ,

නමුත් නුඹලාට අනුව ඉහලට ඉගෙනගැනීමට,

උපාධි කඩයකට බැදී ඉගෙනගන්නා,

නුඹලාගේම සහෝදරයෙක්......

සකියන්ගේ මල් පද 1 - ආදරය...

ආදරය...

දෙහිතක් දෙතැනක ඉකිබිදින
ආදරය...
දෙහිතක් එක් තැනක නතර වන
ආදරය...
දෙහිතක් ලොවට හොරා හෙමි හෙමින් ළං වන
ආදරය...
කවදා කොතැනක අපේම වේදැයි පෙරුම් පුරන
ආදරය...
අහිමි වන්නට නොදී රැකගන්න
ඒ ආදරය......!

 (සියලු ඡායාරූප අන්තර්ජංජාලය :-D ඇසුරෙනි.)

--------------------------------------------------------------------------------

නම නොදමන ලෙස ඉල්ලා තමන්ගේ සිතුවිළි මේ මල් පද වැල් බවට පත් කලේ මගේ යෙහෙළියක විසිනි.මෙහි සියලු ගෞරවය හා අයිතිය ඇය සතුය.මා සිදුකලේ ඇයගේ නිර්මාණය හා ඇයගේ කතන්දරයට ගැලපෙන ඡායාරූප යෙදීම පමණි. මෙවන් නිර්මාණ තවත් සිදුකිරීමට ඇයට ශක්තිය ධෛරය ලැබේවා.....!

හිතේ ඇති මල් පද 1 - අනේ මගේ බොග...

කාලෙකින් පස්සේ නිකමටයි මේ පැත්තේ ආවේ.මගේ බොග මං නවත්තපු තැන තාම එහෙම්මමයි....කිසි වෙනසක් වෙලා නෑ...ඉතිං පාලුවෙන් තනියම මේක දිහා බලාන ඉන්න අතරේ මට මේ මල් පද ගෙත්තම් උනා.......

කලක් ගතවුනත් මා නුඹ දමා ගොහින්...

හිතුනා පැමිණ අද නුඹේ රැව දැක යන්න...

අමතක උනත් පෙරදා මෙන් මුර පදය...

කලකට පසුව ආවෙමි නුඹ සොයාගෙන...

සකසා අලුත් මුර පදයක් නැවත...

ඇතුලු උනා නැවතත් නුඹේ කුටිය වෙත...

මල් මල් සුවද හමමින් ඇත මා වෙතට...

සුපුරුදු උණුහුම දැනුනා පෙර ලෙසට...

අතැර ගොසින් නොසිතූ ලෙස මාස අටයි...

මා නැති කලට නුඹ කිසිවකු පතා නැත...

පතිවත රැකන් මා එනකං බලා හිද...

පෙන්නුවා වෙනස නුඹ හා ළලනාවන් අතර...

දහසක් අඩුපාඩු ඇත නුඹ මාගෙන් ලබපූ...

නෑ එක වචනයක් දෙඩුවේ එකට එක...

කීවොත් ඔතන හිටපං තව මාස අටක්...

සිටිනා බව දනිමි කී දේ එලෙස අසා...

නැත එක් බොරුවක් නුඹ මෙමට කියා...

නැත දිවුරා බොරු කරලා රහස් තියා...

විස්වාසය මගේ රැකලා සිටින නිසා...

වෙන අය මෙන් නොවේ නුඹ මට සිරිලියකි...

පෙරමෙන් අප මිතුරන් මෙහි සිටීවිද...

ඇත්තේ දෙගිඩියාවකි මා සිත පතුලේ...

ආවෙමි නැවත ගෙනෙමින් මල් මල් සුවද...

එන්නෙමි හනික යළි නුඹලා දැකගන්න...

ආවේ නිකමට දැකලා සැනසෙන්න...

සිදුවූයේ පදවැල් පෙළ අමුණන්න...

පබ්ලිෂ් කර මගේ මල් පද කියවන්න...

දෙනවද ඉඩක් පෙරමෙන් නුඹ සනසන්න...

නාමල්ගේ ලිපි අංක 13 - මගේ සරසවි කොතලාවල පියාණන්...

27 වන සෙනසුරාදා සැමට විවෘත වන ජෙනරල් සර් ජෝන් කොතලාවල ආරක්ෂක විශ්ව විද්‍යාලය.

හැමෝටම එහෙනං ආයුබෝවන්ඩ කිව්වා ගොඩ කාලෙකට පස්සෙ.මේ පැත්තෙ කාලෙකිං එන්නත් උනේ නෑ.වෙලාවක් කලාවක් නැති උනත් නොදාම බැරි පෝස්ට් එකක් දාන්නයි මං මේ තකහනියෙන් ලෑස්ති වෙන්නෙ.

උඩ තියන ටොපික් එක දැක්කහම ඉතිං ඕනම කෙනෙක්ට තේරෙනවා ඇති මං මේ කියන්න යන දේ.මගේ සරසවි පියා, ජෙනරල් සර් ජෝන් කොතලාවල ආරක්ෂක විශ්වවිද්‍යාලය අවුරුද්දකට සැරයක් තියන OPEN DAY එක මේ එන සෙනසුරාදා හරියටම කියනවනම් 2014 සැප්තැම්බර් 27 වැනිදා උදේ 8.00 ඉදලා හවස 5.00 වෙනකම් පැවැත්වීමට නියමිතයි.

මොකක්ද මේ OPEN DAY ?

ජෙනරල් සර් ජෝන් කොතලාවල මැතිතුමා

OPEN DAY කියන්නෙ විශ්ව විද්‍යාලයෙ ඇතුලට ඇවිදින් තමන්ගේ දරුවට,මිතුරෙකුට කොටින්ම කියනවනම් වැඩිදුර ඉගෙනගන්න ආස ඕනම කෙනෙකුට විශ්ව විද්‍යාල වටපිටාව,උපාධි පාඨමාලා,ඉගෙනුම් පරිසරය,ඇතුලත්වීමට සුදුසුකම්, විශ්ව විද්‍යාලය සතුව ඇති සම්පත් ආදී සියලුම තොරතුරු දැනගන්න හැමෝටම තියන අවස්ථාවක්.එදාට ආවොත් මේ සියලු විස්තර පිළිබදව ඔබට දැනුවත් වෙන්න පුලුවන්.ඒ විතරක් නෙමෙයි.මං උඩින් ලියලා තියෙන්නෙ මගේ සරසවි පියා කියලා.... වෙන තැනකනම් යොදන්නෙ මගේ සරසවි මෑණිය කියලනේ.එදාට ආවොත් ඔයාලටත් තේරෙයි මං සරසවි පියා කියලා ආමන්ත්‍රණය කලේ ඇයි කියලා.

 

 

ඡායාරෑප අනුග්‍රහය ගයාන් පිරේ

 

මේ OPEN DAY එක ගැන පිරේ එයාගේ අච්චාරුවේ දාලා තිබුනා.ඒකට මෙතනින් යන්න.

තියන තැන හොයාගන්න අමාරු උනොත් මෙන්න ගූගල් මැප් එක

එහෙනම් මතකයිනේ....? මේ සෙනසුරාදා උදේ 8 ඉදං හවස 5 වෙනකම් රත්මලාන සර් ජෝන් කොතලාවල ආරක්ෂක විශ්ව විද්‍යාලය ඔබ වෙනුවෙන්මයි.....

තව පොඩ්ඩෙන් අමතකවෙනවා.... මේ විශ්ව විද්‍යාෙලයට ආව මුල් කාලෙ අපිට තිබුණ නායකත්ව පුහුණුව ගැන මගේ අත්දැකීම් මං මෙන්න මෙහෙම ලියලා තියනවා.ඒ ගැන දැනගන්න ඕන නම් මෙතනින් යන්න.

වැඩිදුර විස්තර ඕනනම් මෙන්න ආරක්ෂක විශ්ව විද්‍යාලයේ නිළ වෙබ් අඩවිය.

 

 

නාමල්ගේ ලිපි අංක 12 - සියලු රියදුරු මහතුන් වෙතයි

වැස්ස,මඩ වළවල් සහ පොන්න රියදුරන්

ඔබත් පොන්න (වඩාත්ම ගැළපෙන වචනය හු**ගෙ යන්නයි) රියදුරෙක්ද?

මාර්ග පද්ධතියක ජීවීන්, පදිකයන් හා රියදුරන් ලෙස කොටස් දෙකකට සරලව බෙදා වෙන් කල හැක.මේ කොටස් දෙක සදහාම නීති පද්ධතියක් ඇති අතර පොත්වල නොලියවූ ආචාරධර්ම පද්ධතියක්ද ඇත.රියදුරන් මෙන්ම පදිකයන් අතරද මෙම ආචාරධර්ම පද්ධතිය බල්ලටම ගොස් හමාරය.

ඊයේ (අගෝස්තු 21) උදේ හතට පමන මම ඉගෙනගන්නා අධ්‍යාපණ ආයතනය කරා පැමිනෙමින් සිටියෙමි.රෑ පුරා වැටුනු වැසි වලින් පාර පුරා ඇති වලවල් වතුරින් හා මඩෙන් පිරී ගොසිනි.ඒ වෙලාවේද මද වැස්සක් වසිමින් තිබුනි.මීටර සීයක් පමණ ගොලුමඩම හන්දියට යාමට මට ඇත,කුඩයක් ඉහලාගත් මම පාරේ මඩ වළවල් බේරා හරිමින් මහත් අපහසුවෙන් ගමන් ගතිමි.නිතරම ඇගට මඩ විසිකරමින් මඩවලවල් මතින්ම වේගයෙන් ධාවනය කරන රියදුරන්ගේ අම්මලා සිහිකරමින්ම ගමන් ගතිමි.වැස්සට තෙමීම කෙසේ වෙතත් විසිවන මඩ පාරෙන් බේරීමට කුඩය දිගු කරමින් ගමන් කිරීම පදිකයන්ට ගුණදායකබව අමුතුවෙන් කීමට නොමැත.

සුදු පාසල් ඇදුමින් සැරසුනු සිසුවියක් තම සොයුරා යැයි සිතිය හැකි කුඩා ළමයකු සමග පාරේ රැදී සිටියේ මේ අතරය.ඔවුන් මට සමාන්තරව පාරේ අනික් පැත්තේය,පාර මැද තඩි මඩවළකි.wp YO-63** (අග ඉලක්කම් දෙක දැන් මට මතක නැත) දරන නිල් පාට ත්‍රීරා්‍ෙද රිය කලින් දවසක යාමට තිබූ ගමනක් යමින් මහත් වේගයෙන් මඩ වල මතින්ම ගමන් ගත්තේ ඔවුන් දෙදෙනා සම්පූර්ණයෙන්ම නාවමිනි.වැඩ දන්නා නිසා මම මගේ කුඩය පහත් කර එම මඩ ප්‍රහාරයෙන් බොහෝ දුරට වැළකීමි.එහි ගමන් කල අවුරුදු විසිඅටක් පමන තරුණ රියදුරාට ඒ ක්‍රියාව මහත් විහිළුවකි.තම උපැස් යුවළ යටින් අප දෙස සිනාසී බලා තව අඩුපාඩුවට රථයේ නලාවද හැඩවූයේ අපිට හයර් නොදී පයින් යනවට හොදවැඩේ කියන්නාක් මෙනි.තෙමුනු සිසුවිය තම කුඩය දිගු කර මොකක්දෝ තම සොයුරාට පවසනු මම දුටිමි.

කුඩයක් ඉහලාගෙන මේ නිවාඩුකාලයේ පාසල් ඇදුමින් සිටින්නෙ අනෙකක් සදහා නොව තම උසස් පෙළ විභාග ප්‍රශ්න පත්‍රයකට මුහුණදීමට යාමට බව මට සිහිඋනි.ඇය වෙනුවට මගේ සොයුරියගේ මුහුණ මට සිහිවිය,ඇයගේ සොයුරා වෙනුවට මගේ මල්ලගේ මුහුණ සිහිවිය.මගේ කෝපය සීමාරහිත විය.සිද්ධිය වූයේ කල්දෙමුල්ල පාරේ ටාටා සේවා ස්ථානය අසලදීය.ගොලුමඩම හන්දියට ඔන්න මෙන්න දුරය.මම විගස ඒ දුර ගෙවා ආවෙමි.එනගමන් පොන්න රියදුරු හට දෙන දඩුවම මෙයැයි තීරණය කර ආයතනයේ සියලු ලාංඡන ගලවා සාක්කුවට දා ගතිමි.සිතුවා නිවරදිය,ඒ රියදුරු පොන්නයා ආපස්සට යාමට අවසාන මගියා නගිනා තෙක් රැදී සිටී.

මම ඔහු අසලට ගියෙමි.සිතේ වූ කෝපය ඔහුගේ කන හරහාම ගමන් ගති.යමක් සිදුවුනි.ටාං ගෑවුනි.... ඔහුගේ උපැස් යුවල ඇදවී ඇඹරී ගැලවී රිය තුලටම වැටෙනු මම දුටිමි.හු**ගේ පුතා ආයි මඩ වලක් ගාවින් යනකොට හෙමිං පල තොපි විතරක් නෙමෙයි පාරේ යන්න ඕන.මුවින් පිට වූයේ එපමණකි.ආයිමත් ඌ මුකුත් කීමට ගතහොත් දෙතුන් දෙනෙකුගේ බිද අත්දැකීම් ඇති මූන මැද ඇති අංගය වන නාසය මොහුගෙත් බිදීමට ඉටා සිටියෙමි.මගේ ඒ සුන්දර අපේක්ෂාව බිදලමින් පළමු ගියරය සැනෙකින් දමා ඔහු ඉගිල්ලී ගියේය.

මෙය කියවන සියලු රියදුරු මහතුනේ.....,ඔබ සියලු දේ නිවරදිව සපයමින්,සම්පූර්ණ කරමින් රියදුරු බලපත ලබාගත් අය වීමට පුුලුවන, නැතහොත් පරීක්ෂකට,රිය පුහුණුකරුවන්ට පගාව දී හෝ වෙනයම් ක්‍රමයකින් බලපත ලබාගෙන රියපදවනවා වීමට පුලුවන.කමක්නැත, පාරේ සිටින්නෙ ඔබේ දුව,පුතා හෝ පවුලේ අය නොවීමට පුලුවන නමුත් ඒ සැවොම මිනිසුන්ය.ඔවුන්ට තමන්ගේ පවුලේ අය ආදේශ කරමින් මොහොතක් සිතා බලන්න.පාසල් යාමට,රැකියාවට යාමට හෝ වෙනත් ගමනක් බිමනක් යන පුද්ගලයෙක් හට මෙවන් අත්දැකීමකට මුහුනදුන් විට ඔහුට හෝ ඇයට සිදුවන අපහසුතාව ගැන සලකා මානුශීය හැගීමකින් යුතුව රිය පදවන්න.ඔබ රියදුරකු නොවී රථයක ගමන් කරයි නම් එම රථයේ රියදුරුහට කරුණාකර මේ බව දැනුවත් කරන්න. 

නෝනගේ ලිපි අංක 1 - උළුදු වඩේ හදමු....

වඩේ වඩේ උළුදු වඩේ...රසයි රසයි උළුදු වඩේ.......

යාලු වෙලා ඉන්න ගෑං ළමයාට බොහොම අමාරුවෙන් කංකෙදිරි ගාලා ඉල්ලලා එයා යන කුකරි කුලාස් එකේ උගන්නපු දෙයක් දාන්නයි මං මේ ලෑස්තිවෙන්නේ..... ඒ වෙන මොනවත් නෙමෙයි උළුදු වඩේ හදනහැටි.....

ආසයි නේ??

ඕන කරන එව්වා.....

උදු පිටි 200g

පාං පිටි 200g

රතු ලූණු 100g

කෑලි මිරිස් මේස හැදි 2

ගම්මිරිස් කුඩු මේස හැන්දක් පමණ

පොල් බෑයක පොල්

කරපිංචා

කහ කුඩු  

අවශ්‍ය පමණට ලුණු

පොල් තෙල්

ආප්ප සෝඩා තේ හැන්දක් පමණ

සාදන ක්‍රමය

1.කරපිංචා හා ලූණු සෝදා සිහින්ව කපාගන්න 

2.පසුව භාජනයක් ගෙන පාං පිටි,උදු පිටි,ගා ගත් පොල්,ලූණු,කරපිංචා,ලුණු,ආප්ප සෝඩා,ගම්මිරිස්,කෑළි මිරිස් එකතු කර වතුරින් අනා ගන්න.
3.ඉන් පසු එම මිශ්‍රණය පැය 4ක් 5ක් පමණ පිපෙන්නට තබන්න.

4.පසුව පිටි මිශුණයෙන් කුඩා ගුලි සාදා ඒවායේ මැද හිල (සිදුර) සාදා ගන්න

5. පසුව තාච්චියක් ගෙන තෙල් දමා තෙල් රත්වන විට එම සාදා ගත් ගුලි එයට දමා මදගින්නේ රන්වන් පාට වන තෙක් බැදගන්න

 

 දැං ඉතිං කටට උනපු කෙල ටික ගිලලා.කටට සැර එන්න හොද ලුණු මිරිසකුත් හදාගත්තනං..........
හදපු උළුදු වඩේ වල රස බලන එක තමයි දැං තියෙන්නේ.....
හා එන්න එන්න පෝළිමේ.... වඩේ වඩේ උළුදු වඩේ....රසයි රසයි උළුදු වඩේ.......!!

දැං ඉතිං කාල බලපු උළුදු වඩේ වල රස ගුණ කියලම ගියානං...................

 

නාමල්ගේ ලිපි අංක 11 - සිතින් පාසල් කාලයට ගියෙමි

 අඩෝ බ**... උබේ අම්මට.....!!

මාස ගානකින් මුකුත් ලියන්න බැරි උනා.හරියටම කියනවනං මාස හතරයි දවස් විසි හයකින්.හත්ඉලව්වේ.....ඒ කියන්නෙ මාස පහකිං විතර.....උනන්දුවක් තිබ්බෙ නැති එක තමයි සේරටම මුල,එහෙම නැතිව මං බිසී පොරක් කියලා පෙන්නන්න වේලාවක් තිබුනෙ නැතිව එහෙම නෙමෙයි.එක්සෑම් ලියලා යන්තං සතියක් නිවාඩු ලැබුනා(නොදෝකිං තව සතියක්වත් දුන්නනම් මක් වෙනවද?).පෙරේදා හවස බෙලිඅත්තෙ ඉදං මොනරාගල එන්න බස් එකට නගින්න බෙලිඅත්තෙ බස්ටෑං එකේ ඉන්න කොට අපිට ඕලෙවල් වලට ඉස්කෝලෙදි ගණිතය උගන්නපු දියොකුබදු සර්ව දැක්ක.දැං නම් දියොකුබදු සර්....ඒ කාලෙ විදියටනම් දියබ*** නැත්තං බද්*.සර් දැං වයසයි,හරි තෙහෙට්ටු වෙච්චි පෙනුමක් තිබ්බේ.ලොකු මල්ලක් අරන් දාඩිය පෙරාගෙන හනිකට තංගල්ලෙ බස් එකකට ගොඩඋනා.කතාකරන්න කියලා මං වාඩිවෙලා ඉදපු තැනින් නැගිටිද්දිම ඒ බස් එක ගියා.හිතේ කොනක මොකක්දෝ මන්දා අමුතු දුකක් දැනුනා බස් එක යනවා දැකලා.

ඒ එක්කම මට මොණරාගල බස් එක ආවා.යන්තං ශීසීට් එකකුත් හම්බුනා.මගේ හිතේ කොනක මොකක්දෝ මන්ද අමුතු දුකක් මට දැනෙනවා වගේ.ඒ කාලේ සර්ට හූ තියපු හැටි,සර්ගෙ මෑණියෝ ආදරෙන් මතක් කරපු හැටි මට චිත්තරපටියක් වගේ මතක් වෙන්න ගත්තා.

මේ ඉන්නෙ මගේ ආදරණීය වීරකැටිය පාසල් මව....

ඒ කාලෙ මං හිටියෙ නමය වසරේ,එතකොට දියෝකුබදු සර් තමයි අපේ ශ්‍රේණි භාරව ඉදියේ.ගිය ආත්මෙ කරපු කුජීත වැඩකටද මන්ද මට සර්ව පෙන්නන්න බෑ,සර්ට මාව පෙන්නන්නත් බෑ.ඒ මොකද කියනවනං බස් වලදි හූ තියලා,ෂර්ට් එකේ බට්න් ඇරං ඉදලා,ලොකු කොල්ලොත් එක්ක බජව් දාලා,පීරියඩ් කට් කරලා අහුවෙලා වගේ, අපිට සීනි බෝල ඒත් සර්ලට කක්කි බෝල ප්‍රශ්න නිසා....ඒ කාලෙ මං ඉගෙනගත්තෙ කඩ්ඩ මීඩියම් පංතියේ.හරි ශෝක් පංතිය,කිසි වළියකට ප්‍රශ්නෙකට ගෑවුනේවත් නැති පංතිය.පිරිමි ළමයි කියලා වෙනසක් නැතිව උනුත් ගෑං ළමයි වගේ හිටියා, ඔව් උන් ඇල් වතුරත් නිවලයි බිව්වේ.අපි කරන කියන හොර වැඩ මාට්ටු වෙන්නෙ නැතිව කරගෙන හැමදාම හොද ළමයි උනා.පංතියේ ළමයි විසි නමයයි ඉදියේ.මංතුමා හැමවාරෙම විසි අට.....කියන්න සතුටුයි නේ???  ඒ කාලේ හැමදේටම මාත් එක්ක හිටපු, පස්සේ කාලෙදි කි*** හන්ද වෙනස් වෙච්චි මටම හරියන එකෙකුත් ඉදියා....ඌ පංතියෛ් විසිනමවැනි තැන දිනං හිටියා.....ඔව් කියන්න සතුටුයි පංතියේ අවසානෙ ඉදං මුල්ම ස්ථාන දෙක අපි බොහොම ගෞරවෙන් රැකං හිටියා කාටවත් නොදී......

ඒකාලෙදී ඉස්කෝලෙ කොල්ලොන්ට පුදුම උණක් තිබුනා.ඒ තමයි ඉමිටේෂන් ගෝල්ඩ් පාට චේන් දාන එක.එහෙම චේං කෑල්ලක් දාලා ෂර්ට් එකේ උඩ බොත්තමත් ඇරං ඒ කාලේ මයිල් ගහක් බේතකටවත් හොයා ගන්න බැරි පපුව පෙන්නං යද්දි කොල්ලොන්ට හිතුනලු කෙල්ලෝ සෑහෙන්න බලයි කියලා....හූ හූ පව් නේ.....?? දැංනං මතක් වෙනකොටත් හද්ද නෝණ්ඩිය....ඒත් ඉතිං මක් කොරන්නයැ විසේ බේරෙන,පැණි බේරෙන වෙරලු මල් සුවද හමන කොලු කාලෙනේ...

ඔන්න ඉතිං මං තුමාටත් අර උඩ කිව්ව උණ වැළදුනා..හරියන්නෙ නෑ..ගියා හංදියෙ කඩේ ගාවට...ගත්ත කඩි බිත්තර පැකට් දෙකක්.කඩි බිත්තර ගැන නොදන්නා පිංවතුනි.....කඩි බිත්තර යනු පාට කළ පැණි රස හූනු බෙටි වේ.... චී...යාාා නේද? ඒකාලේ කඩි බිත්තර පැකට් එකකට අනං මනං පොඩි පොඩි අයිටම් හම්බුනාහුය...(වියාකරණ හරිද මංදා).මංතුමා ගත්තේ ඉමිටේෂන් ගෝල්ඩ් කලර් මාල ඇති පැකට් දෙකකි.දෙකක් ගත්තේ එකක දිග බෙල්ලට දා ගැනීමට තරම් ප්‍රමාණවත් නොවුනු නිසාය.ගෙදර එන ගමන් හූනූ බෙටි වල සස බලා ගෙදර ආ විගස අඩුවකුත් ගෙන මාල දෙක මූට්ටු කර තනි මාලයක් කිරීමේ මහා මෙහෙයුමද සිදුකළෙමි.

ඊළග දවසේ මහත් බලාපොරොත්තු සහිතව මාලය සුරැකිව සාක්කුවේ දමා ලොකු කොල්ලන්ගෙන් වස්තුව රැකගෙන පාසලට ආමී.අපේ පන්තියට පැමිණ මාලය බෙල්ලෙ එල්ලා ගෙන උඩ බොත්තමද ගලවා වීරයකු සේ රැගීමට පටන් ගතිමි.(උඩ බොත්තමද නැත්නම් බොත්තං දෙක තුනද කියා මට දැං මතක නැත).දාඩිය නැතත් දාඩිය දානවා සේ පෙනෙන්න මාලයට බොරුවට පිඹ පිඹ දැමූ රැගුම් ගැන දැංනං විලි ලැජ්ජාවේ තංතෝතෙ බැරිය.පීරියඩ් කට් කර පංතියෙන් එළියට විත් රැගුම් දමන අතරේ බද්දාට හදිසියේම මා මුලච්චි විය.

ඔය ළමයා මෙහෙ එන්න.දැං මොනවද තියෙන්නෙ?

මුකුත් නෑ සර්.මේ මේ වතුර ටිකක් බොන්න ආවා......

මොකෝ අනිත් පැත්ත හැරිලා?බොත්තම ගළවගෙනද ඉන්නෙ??

(ඒ දවස් වල උඩ බොත්තම ගලවං සිටීම යනු දඩුවං ලැබිය හැකි වරදකි)

නෑ නෑ සර් මේ මේ මගේ බොත්තම ගැළවිලා.ඔව් සර් ගැළවිලා ඔව් ඔව්  

කෝ බලන්න....යකෝ මූ මාලෙකුත් දාං ඇවිල්නේ...කොහේද මගුලකවත් යන්නද?ඔය බොත්තම කැඩිලද බොල.... (ටෝං......සෑර් තුමා විසිං මංතුමාගේ කන ඉතා ආදරයෙන් අතගාන ලදී)පොඩි උන්ගේ පංතියක් ඉදිරියේ නිසා ලැජ්ජාව බාල්දියෙන් එකකි. 

සෑර්ගේ මෑණියං ආදරෙං මතක් කරන එක ඇර වෙන මං මක් කරන්නද??(ඒ වෙලාවේ හිතිං කිව්ව ඒක වෙන්න ඕන උඩම තියෙන්නෙ)

නෑ සර් මේ හවස මගුල් ගෙදරක යන්න කියලා අම්ම ඕක උදේ දැම්මෙ සර් කරට.මගේ මාලෙ රත්තරං සර්....(වටිනාකම වැඩිවීම හා අම්මා යන වචනය හේතුවෙන් මාලය ආපසු මට දේ යැයි බලාපොරොත්තුවෙන් මං ඒ මහා කෙබ්බය ඇත්තක් ලෙස දෙසා බෑවෙමි) 

හා රත්තරංද?ගලවපිය ඕක.හෙට උදේ අම්මත් එක්ක වර මං මාලෙ දෙන්න.....(සෑර්තුමා විසින්ම බොරු රත්තරං මාලය ගලවා එතුමාගේ සාක්කුවට දා ගනී)

අනේ එහෙම කරන්න එපා සර්...තවත් නෑ...අනේ සර්....

නෑ නෑ මං ප්‍රිංසිපල් සර් ලගට එක්ක යන්නද නැත්තං හෙට ගෙදරිං එක්කං එනවද?

නෑ නෑ සර් මං අම්ම එක්කං එන්නං..(ඒ කාලයේ පිනා ළගට යාම යනු විහින්ම ඇරගැනීමක් හා ගුටි ලෝකයකි)

එදා දවසේ ඉතිරි ටික කෙසේ ගෙවුනිදැයි මට මතක නැත.මතක ඇති කාලෙකට මගේ මව්තුමිය මගේ වැඩකට පාසලේ පස් පාගා නැත.මං මට වෙන පජාත වැඩ ගෙදරට කියන්නේද නැත.මංද, මංතුමා ගෙදරට හරි හොද ළමයකු නිසාය.

ඊළග දවස උදා උනි.බද්දාට මාට්ටු නොවී දවස ගෙවීම මගේ පරම උත්සාහය විය.පීරියඩ් කට් කර ඇවිද ඇවිද හිටියොත් බද්දා කෙසේ හෝ මා අල්ලගනී.එනිසා මහත් වෑයමෙන් උදේ සිට පංතියේ සිටීමට ඉටා ගතිමි.මට මතක හැටියට ඒ වෙලාවේ පංතියේ හිටියේ අංක එක හොරා අංක දෙක හොරා ආදී ලෙස අපව හංවඩු ගැස්වූ ආදරණීය පියා....පියසිරි සර් හැර වෙන කවරහුද? 

කෙළාහුටා.......!!!, 

මෙන්න බද්දා අපේ පංතියේ...සර් මං මෙන්න මේ ළමයා පොඩ්ඩක් ගනනවා... 

මගේ දිහාට ඇගිල්ල දිගු කර බද්දාතුමා පැවසීය..මුලු පංතියෙම ඇස් මගේ දිහාවටය....මරන්න ගෙනියන හරකකු සේ බොහොම අමාරුවෙන් මා නැගිට්ටෙමි.නැගිට පංතියෙන් එළියට ආමි..ටික දුරක් ගිය පසු බද්දා මගේ දිහාට හැරුණි.... ඩෝං බඩෝං දඩ බඩාං......අලි වෙඩි රැළක් මගේ කන් අසල පත්තු වෙනවා මෙන් දැනුනි... ඉස්සරහට පස්සට දෙපැත්තට මා විසි වෙනවා ළාවට මතක ඇත...සර් මා හට කරුණාව දක්වා ඇත....(නැවත වරක් මට හිතෙන දේ කියවීමට උඩටම ගොස් මාතෘකාව බලන්න....)

සර් සාක්කුවට අත දමා මොකක්දෝ කලු දංවැල් කෑලි දෙකක් එලියට ගන්නා ලදී...මේ මොකක්ද බොල මේ....??

මෙන්න උබේ රත්තරං මාලෙ...අරං ගිහිං තොගෙ අම්මට දීපිය...

හැක් හැක්....හැක්......!! මගේ සත්තලං මාලය.....එය සර්ගෙන් අතට ගනිද්දී රත්තරං පාට කුඩු වගයක් මගේ අතේ තැවරුනි.මගේ දාඩියට හා සර්ගේ සාක්කුවේ තිබූ දේ වලට ඇතිල්ලී මාලයේ රත්තරං පාට මැකී ගොස් කලු පාට දංවැල් දෙකක් මතුවී ඇත...ඒ විතරක්නම් මදැයි....මං බොහොම අමාරුවෙන් සෑදු පූට්ටුවද ගැලවී ගොසිනි...හී හී.......අන්න එහෙමයි එක දංවැල දංවැල් දෙකක් වෙලා තියෙන්නෙ.......

නැවත වරක් ඩෝං ඩෝං.....මගේ පිටකොන්ද ආදරයෙන් අතගානවා මට දැනුනි.... 

දැං පළයං පංතියට...

(හා හොදයි හු#$%^ කොල්ලෝ....මං හිතිං)  

කතාවක් එසේ අවසන් විය.දහය වසරෙදි හා එකොළහ වසරෙදි ගණිතය ඉගැන්වීමට සිටියේද බදු සර්ය....ඇත්තටම මං එම කාලයේදී ඉතා විනීත,කීකරු සිස්සයකු බවට පත්විය....කොටින්ම කිව්වොත් සිස්නස නායකයකු බවටද පත්විය.රිසාල්ට් ඇවිත් මා දියෝකුබදු සර් හමුවමට ගොස්, සර් මට ඒ එකක් තියනවා කී විට ඔහු සතුටින් මගේ අත මිරිකා ටික වෙලාවක් නිහඩව සිට පිටට තට්ටු දමමින් මං ඕක දැනං හිටියා යැයි කියූ හැටි මට හොදින් මතක ඇත.....

ඇත්තටම ඒ කාලයේ ගුරුවරු ගුටි ගසා හෝ අපිව මෙහෙම තැනකට ගෙනාපු එක ගැන මතක්වෙද්දි දැන්නම් මාර සතුටක් ඇත.නැත්නම් අද අපි මේ ඉන්නා තැනකවත් නැත.ඒ කාලේ මේ කුණුහරුපෙන් බැනපු කටවල් වලින්ම දැං හොද කියන්නෙ ගුරු වෘත්තියෙ තියන සාධු බලෙන් වෙන්න ඕන.ප්‍රයිමරියෙ ඉදං වලි වලට ගිහිං එකෙක්ගෙ බිජ්** පයින් ගහපු එකකට මගේ ඔලුව බිත්තියෙ හප්පලා මාව කබඩ් එකක දාල වහපු කරුණාරත්න ප්‍රින්සිපල් සර් වගේම (එතුමා සාමදානයේ සැතපෙන්න ඕන.අන්න සර්ලා) මට ගුටි බැට දීලා,අවවාද දීලා මාව හොද මගට ගත්තු ගුරුඋතුමන් හැමෝම නීරෝගීව,නිදුකින්, ඉන්න තැනක සැපෙන් සතුටින් ඉන්න ඕන කියලා මං මගේ හිත පතුලෙන්ම ප්‍රාර්ථනා කරනවා.....

ඇත්තටම මට ආයිත් ඒ කාලෙට යන්න ඇත්නං...ආයිමත් ඒ වගේ පඩත්තර වැඩ කරන්න තියනවනං..............!!!

අසමජ්ජාති විදියට ජොකා පිටිං ඉස්කෝලෙදි තැඹිලි කඩපු කොල්ලෙක් ගැන කියවන්න ඕන නම් මෙතනින් යන්න. 

 

 ඉස්කෝලේ කාලෙදී ඇම්ඩා වැඩ කරපු එවුන්ට සෑහෙන්න රස,ලස්සන අතීතයක් තියනවා.එහෙම කරපු උන්...ඒ වගේම ඉස්කෝලෙ කාලෙ පීරියඩ් එකක්වත් කට් කරලා නැතිව රෙකෝඩ් තියලා ඉන්න උන් ටිකක් හරි ආයිමත් ඒ ලස්සන අතීතෙට ගියා නේද........................????

නාමල්ගේ ලිපි අංක 10 - දියවැඩියා රෝගීන් හා ඔවුන්ගේ දෙපා

දියවැඩියා රෝගීන් හා ඔවුන්ගේ දෙපා

                 ශ්‍රී ලංකාව වැනි දියුණුවෙමින් පවතින රටක බෝ නොවන රෝග අතුරින් ඉහලම ස්ථානයක සිටින්නේ දියවැඩියාව නොහොත් ආයුර්වේද වෛද්‍ය විද්‍යාවට අනුව හදුන්වන මධුමේහයයි.ලංකාවේ එම අනුපාතය 3ට 1 කි.එනම් සෑම මිනිසුන් තිදෙනෙකුම අතුරින් එක් පුද්ගලයකුට දියවැඩියාව වැළදී ඇත.මේ රෝගයේ විශේෂත්වය වන්නේ සෑදීමට වයස් භේදයක් නොමැති වීම හා පූර්ණ ලෙස සුවයක් ලබා ගැනීමට නොහැකි වීමයි.
යම් පුද්ගලයකුගේ රුධිරයේ ග්ලූකෝස් මට්ටම නියමිත ප්‍රමාණයට වඩා ඉහල යාම දියවැඩියාව ලෙස සරලව හදුන්වනවා.මෙම රෝගය වැලදුනු අයගෙන් 50% ක් පමණ පෙර රෝග ලක්ෂණ පෙන්නුම් නොකරන අතර ඉතිරි 50% අතර පහත සදහන් රෝග ලක්ෂණ දැකිය හැක..

1.දිනකට සාමාන්‍ය ප්‍රමානයකට වඩා වැඩි වාර ගණනක් මුත්‍රා පිටකිරීමට අවශ්‍ය වීම
2.වැඩිපුර වතුර බීමට යොමුවීම (ඉහත කරුණු දෙක දවසේ ඕනෑම වෙලාවක වලංගු වේ)
3.කෙටි කලක් තුල ශරීරය කෙට්ටු වීම හා බර අඩුවීම
4.අධික ලෙස විඩාපත් බව හා එකදිගට යම් වැඩක් කිරීමේදී දැඩි තෙහෙට්ටු ගතියක් ඇතිවීම
5.ඉවසිලි මදිවීම හා යම් කෙටි කරුණක් නිසා දැඩි කේන්තියක් ඇතිවීම
6.ඇස් පෙනීම දුර්වල වීම
7.ආහාර රුචිය වැඩිවීම (පැණිරස අහර වලට වැඩි ප්‍රියත්වයක් දැක්වීම)
8.ලිංගික අප්‍රාණිකත්වය
9.තොල කට වියලී යාම සහ ශරීරයේ වියලි බව
10.සෑදෙන තුවාල සුව වීමට වැඩි කාලයක් ගතවීම
11.ඇස් වල ග්ලූකොමා තත්වයන් ඇතිවීම නිසා පෙනීමට බාධා ඇතිවීම

රුධිර පරීක්ෂණයක් මගින් දියවැඩියාව වැලදී ඇතිබව ඉතා නිවරදිව දැන ගත හැක.

දියවැඩියාව වැළදීමට බලපාන කරුණු හා වැළදීමේ හැකියාව වැඩි පුද්ගලයන්

1.තම පවුලේ පියාට හෝ මවට රෝගය වැළදී ඇති අයට මෙම රෝගය තමාට වැළදීමේ ඉතා වැඩි සම්භාවිතාවක් ඇත
2.අවුරුදු 35ට වැඩි පුදුගලයන්
3.ගර්භනී අවධියේ පසු වන කාන්තාවන්
4.මානසික ආතතියෙන් දිනපතා තම වැඩකටයුතු කරගෙන යන පුද්ගලයන්
5.තරබාරු අය සහ නිතර කෘතීම බීම වර්ග පානය කරන පුද්ගලයන්
6.සීනි,පිටි හා තෙල් පරිභෝජනය වැඩි පුද්ගලයන්

දියවැඩියා රෝගීන්ට නිර්දේශ කරන Metformin, Rosiglitazone, Sitagliptin ආදී
බෙහෙත් පෙති වර්ග වල පසු කාලීන සංකූලතා (after effects)  බොහොමයක් ඇත.ඒවා අතර ප්‍රධාන වන්නේ වකුගඩු වලට ඇති කරන හානියයි.

දියවැඩියාවෙන් වැළකීමට නම්,

1.වෛද්‍ය උපදෙස් මත ආහාර පාළනය සිදු කිරීම
2.සතියට දින 3ක් 4ක් වත් ඇග වෙහෙසෙන ව්‍යායාම සිදුකිරීම (හැල්මේ දිවීම,බයිසිකල් පැදීම,පිහිනීම,....)
3.ආතතිය රෝගය වැළදීමට එක් ප්‍රධාන හේතුවක් බැවින් ආතතියෙන් වැළකීම
4.කෘතීම,පැණිරස ආහාර වලින් හැකි තාක් ඈත් වීම
5.ස්වාභාවික තන්තු ප්‍රමාණ වැඩි ආහාර,නැවුම් පළතුරු,පළා වර්ග ආහාරයට නිතිපතා එක් කිරීම

දියවැඩියාව නිසා ඇතිවන පසු සංකූලතා.....

අංශභාගය
රුධිර නාල තුළ කොලෙස්ටරෝල් තැන්පත් වීමත් අධි රුධිර පීඩනය වැළඳීමේ ප්‍රවනතාවත් වැඩි නිසා දියවැඩියා රෝගීන්ට අංශභාගය වැළඳීමේ ප්‍රවනතාව ද වැඩියි.
හෘදයාබාධ
හෘදය තුළ ඇති රුධිර නාලවල කොලෙස්ටරෝල් තැන්පත් වීමත් අධි රුධිර පීඩනයට එරෙහිව හෘදය ක්‍රියාත්මක වීමත් නිසා හෘදය දුර්වල වීමද සිදුවෙනවා.
වකුගඩු අකර්මන්‍ය වීම
දියවැඩියාව නිසිලෙස පාලනය නොකළහොත් රුධිරයේ ඇති අධික ග්ලූකෝස් මුත්‍රා සමඟ පිට කිරිම සඳහා වැඩිපුර මුත්‍රා තැනීමට සිදුවෙනවා. මේ සඳහා වකුගඩුවලට වැඩි වෙහෙසක් ගැනීමට සිදුවීම නිසා වකුගඩු අකර්මන්‍ය වෙනවා.
අක්ෂි දුර්වල වීම
ඇසේ සුද ඇතිවීම, ඇසේ පීඩනය වැඩිවීම හෙවත් ග්ලූකෝමා ඇතිවීම, ඇසේ රුධිර නාල සහ ස්නායු දුර්වල වීම නිසා දෘෂ්ඨි විතානයට හානි පැමිණීමෙන් අන්ධභාවය ඇති වෙනවා.
පාදවල තුවාල
පාදවල ස්නායු දුර්වල වීම නිසා දැනුම් තේරුම් නොමැති වීම, රුධිර නාලවල කොලෙස්ටරෝල් තැන්පත් වීම නිසා ඉන් එහාට රුධිරය ගමන් නොකිරීම හේතුවෙන් තුවාල සුවවීම ප්‍රමාද වීම සහ රුධිරයේ ඇති ග්ලූකෝස් මට්ටම ඉහළ යාම නිසා එම ස්ථානවල විෂබීජ සීඝ්‍රයෙන් වර්ධනය වීම හේතුවෙන් තුවාල සුවවීමේ ප්‍රවනතාව අඩුවෙනවා.
ලිංගාශ්‍රිතව ඇතිවන තත්ත්ව
මුත්‍රා සමඟ සීනි පිටවීම නිසා ලිංගික ප්‍රදේශයේ මුත්‍රා තැවරීම හේතුවෙන් ශිෂ්ණය සහ යෝනි ප්‍රදේශයේ කැන්ඩි ඩයිසීස් හෙවත් උල්ලෝගම් වැනි පුස් රෝග ඇතිවිය හැකියි.
අවග්ලූකෝසියාව
දියවැඩියා රෝගියෙක් වැරදීමකින් හෝ ඖෂධ වැඩිපුර ගතහොත් හෝ අධික ලෙස ව්‍යයාම කළ හොත් රුධිරයේ ග්ලූකෝස් මට්ටම අඩු වී අව ග්ලූකෝසියාව හෙවත් හයි පෝග්ලයිසීමියාව ඇතිවෙනවා. එවන් අවස්ථාවකදී රෝගියාට දහඩිය දැමීම, අධික බඩගින්න සහ හෘදය වේගයෙන් ගැහෙන තත්ත්ව ඇතිවිය හැකියි. මෙහිදී ප්‍රතිකාර ලෙස සීනි, තේ හැදි 02ක් ලබාදීම, ග්ලූකෝස් තේ හැන්දක් හෝ චොකලට් කැබැල්ලක්, ටොෆියක් ලබා දීම කළ යුතුයි.
_ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _ _
සංවේදී අය පහත රූප බැලීමෙන් වලකින්න

දියවැඩියා රෝගීන්ගේ පාදවල තුවාල
ඉහත සදහන් පරිදී රුධිර නාළවල අහිතකර මේද තැන්පත් වීම නිසා රුධිර සැපයුමට බාධා ඇතිවේ,එම නිසා ශරීරයේ කොතනක හෝ ඇතිවන තුවාල (පාදවල විශේෂයෙන්) සුවවීමට ඉතා වැඩි කාලයක් ගතවේ,තවද ඉතා දැඩි විශබීජ වර්ධනය නිසා ඇතිවන සුලු තුවාලයකින් සමහර විට ඒ ශරීර අංගය කපා ඉවත්කිරීමට තරම් තත්වය බරපතල විය හැක.



  පාදවල ඇතිවන තුවාල

කුඩා සීරීමකින් පටන් ගන්නා මෙවන් තුවාල දියවැඩියා රෝගීන්ගේ ජීවිතය සහමුලින්ම අඩාල කිරීමට පවා සමත්ය.වෛද්‍යවරු පවසන්නේ දියවැඩියා රෝගීන් තම දෙපා තමාගේ මුහුන මෙන් පවත්වා ගෙන යා යුතු බවයි.මේ සදහා,
1.නිතරම තම දෙපා පිරිසිදුව,වියළිව කබා ගැනීම
2.දිනපතාම තම දෙපා ඉතා හොදින් නිරීක්ෂණයට ලක් කිරීම
3.සුලු හෝ සීරුමක් ඇත්නම් නොපමාව අවශ්‍ය ප්‍රතිකාර ගැනීම
4.සෑම විටම දෙපා ආවරනය වන සේ සපත්තු පැළදීම(දෙපා හා සපත්තු අතර ඝර්ෂණය අවම කිරීමට මෘදු සම් පැඩින් වර්ග යෙදීම වඩාත් සුදුසු වේ)

5.දිනපතා පාද සදහා ව්‍යායාම කිරීම හා නින්දට යාමට පෙර උණු වතුරින් දෙපා සම්භාහනය කිරීම

පාදවල ඇතිවන තුවාල ගණන් නොගැනීමෙන්,

දියවැඩියාව නම් වූ නිහඩ මාරයාගෙන් වැළකීමට අද සිටම ඔබත් ඔබේ චර්‍යා රටාව වෙනස් කරගන්න.....

ඡායාරූප ගූගල් අනුසාරයෙන්.සමහර විස්තර දිනමිණ පත්‍රයකින්

නාමල්ගේ ලිපි අංක 9 - නීතිය කාටද?රකින්නෝ කුමටද?

නීතිය කාටද?රකින්නෝ කුමටද?

කාලෙක ඉදං ලියන්න හිතේ තියං එකක් තමයි මේ ලියවෙන්නෙ.සහෝදර බ්ලොග් අඩවි කීපයකම මේ සම්බන්ධව ලිපි කීපයක් දැකපු හන්දා තමයි මේකම දාන්න ඕන කියලා හිතුනෙ.මෙන්න ඒ ලිපි.....

1. ප්‍රියා අයියගෙ පොලෝසිය හොරු සමග හෙළුවෙන් ………
2. අවන්හලේ පොලිසිය... ලංකාවේ අපෙ පොලිසිය..-01
3.ඔමා අක්කගෙ පොලිස් කේස් එකක්

 වැඩි කතා ඕන නෑ.මෙන්න මේකයි උනේ.මුලින්ම කියන්න ඕන පොලිස් සේවයේ අවංකව,නීතිගරුකව තම රාජකාරිය කළට වෙලාවට නිසි අයුරින් ඉටු කරන සියලු නිළධාරීන්හට මේ ලිපිය අදාල නොවේ.ඉහත සදහන් නොවූ අනිත් අවශේෂ කුලක සදහා මෙය වලංගු වේ.මුලින් සදහන් කළ උතුමන්ට අපගේ නිබද ගෞරවය හිමිවන අතර රට,රාජකාරිය වෙනුවෙන් කරන කැපවීම උතුම් කොට සළකමු.

කැම්පස් කොලුවකු සමග එකට නර්ථනයේ යෙදෙන විනයගරුක නිළධාරී උතුමෙක්

උදෑසන ශරීර සුවතා වල නිරතවන ක්‍රීඩාකාරී උතුමන් පිරිසක්

අද නීතිය බල්ලට ගොස් ඇතැයි එදිනෙදා දකින අසන පුවත් වලින් මනාව පැහැදිලි වේ.තරු සහිත පොලිස් මහත්හොරු තම දරුවන් සමග එකට හිරේ ඉන්නා පුවත් පසුගිය කාලයේදී මහත් ජනප්‍රිය විය.අල්ලස් ගැනීම්,විවිධ අපචාර,දූෂණ චෝදනා,සොරකම් ආදිය දැන් සාමාන්‍ය සිද්ධීන් වේ.මේ සා චෝදනා පොලීසියට එල්ල නොවේනම් අන්න එදාට අප සිටින්නෙ ආසියාවේ ආශ්චර්ය තුලය.අඩු කාලයකින් නවීන පන්නයේ ඉතා වටිනා නිවසක් සාදාගැනීමට නම් ට්‍රැෆික් පොලීසියට හෝ සුරාබදු ඒකකයට රාජකාරී කිරීමට පැනීම ඉතා සුදුසු බව රට්ටු පවසන අයුරු කිහිප වතාවක්ම මගේ කනට ඇසී ඇත.නීතිය සුරකීමට පත්කල ඇති එම නිළධාරීන් තම රාජකාරිය අවංකව ඉටු නොකළහොත් රටේ පවතින නීති පද්ධතිය පිළිබද මහජන විශ්වාසය බිද වැටීම වැලැක්වීම වයිමාටද කළ නොහැකි දෙයකි.පහත සිද්ධිය දෙස බලන්න...

දිනය - 2013/12/26
වේලාව - දහවල් 1ට පමණ
ස්ථානය - පොලොන්නරුව කදුරුවෙල දුම්රිය ස්ථානය ඉදිරිපිට
සිද්ධිය - දුම්රිය ස්ථානය ඉදිරිපිට ඇති කහඉර මත රාජකාරියේ නියුතු පොලිස් නිළධාරියාගේ මිතුරකු මෝටර් සයිකලයකින් පාරේ ගමන් කරනු එම නිළධාරියා දැකීම,ඔහුව කහඉර මත නතර කිරීම,විහිලු තහලුවෙන් ඔහු සමග කහඉර මතදීම විනාඩි කිහිපයක් ගතකිරීම,පාරේ වාහන තදබදයක් ඇතිවීම,පසුපසින් ආ බස් රථ රියදුරකුගේ නළා හඩින් කුපිත වූ අනිත් නිළධාරියා එම රියදුරුට බැන වැදීම හා වාහන රියදුරන්ගේ නළා හඩ මධ්‍යයේ නිළධාරීතුමා තම මිතුරාට සමුදීම

එම අවස්ථාව

එම නිළධාරියා සහ පාරේ සිටිනා සිව්පාවා අතර වෙනස = පිළිතුර ඔබ තීරණය කරන්න

එම පොලිස් නිළධාරියාගේ රාජකාරි අංකය - 50559 

එම නිළධාරියා අතින් සිදුවූ වැරදි/අඩුපාඩු (මට හැගෙන පරිදී) -

1.කහඉර මත වාහන නැවැත්වීමට අනුබල දීම
2.කහඉර මත නැවැත්වූ වාහනයේ රියදුරු වරදකරුවකු නොකර නිදහස් කර යැවීම
3.තම රාජකාරිය නිසි ලෙස ඉටු නොකිරීම හා පැහැර හැරීම
4.මාර්ගය මත අනතුරක් සිදුවීමට ඉඩක් සැපයීම
5.කහඉර මත පදිකයන්ගේ ආරක්ෂාව තහවුරු නොකිරීම
6.අන් අයගේ වටිනා කාලය අපතේ යැවීම
7.නීතිය රකින්නන් පිළිබද නරක ආදර්ශයක් සැපයීම


වෙන කවුරුහරි අහිංසක මනුස්සයෛක්ගෙ බයික් එකක් කහඉර උඩ වැරදිලාවත් නැවතුනොත් පොලිස් මහත්වරු ඒ මනුස්සයව ඉතුරු කරන්නනෙ නෑ.මේක දැකපු ගමන් මට හිතුනෙ මෙන්න මේ දේ විතරයි.නීතිය කාටද? රකින්නෝ කුමටද?

මං බොහොම ප්‍රො‍පෙසනල් විදියට තමයි උක්ත ආක්කියාතෙ ගලපලා ඔය උඩ ටික ලියන්න ට්‍රයි කලේ.ඒකෙත් පොඩි අයිටම් එකක් තියනවා බලන් යනකොට....
 
පොලිස් කියන වචනෙ ලොකු තේරුමක් තියනවා.මෙන්න ඒ තේරුම

Polite - ශිෂ්ට/ආචාරශීලී
Obedient - යටහත්/ශික්ෂිත
Loyal - දේශප්‍රේමී/ලෙන්ගතු
Intelligent - දැණුම් තේරුම් ඇති/ප්‍රඥාවත්
Courageous - එඩිතර/ධෛර්යසම්පන්න
Efficient - ක්‍රියාශූර/කාර්යක්ෂම


පොලිස් නිළධාරියෙක් උනාම ඔන්න ඔය උඩ තියන ගති ලක්ෂණ තියෙන්න ඕනලු.පාරෙ යන පොලොස් මහත්තයෙක්ගෙන් එහෙම අහලා ලාවට කන පලා ගත්තොත් ඔන්න මමනං නෑ.


අනාගතේ පොලිස් කියන වචනෙ මෙන්න මෙහෙම වෙනස් වෙන්න ඉඩ තියේලු

අදත් විමසුම පිටපත !@#$%^ ගෙන්..............හැක හැක......!!

මේක ලියලා පබ්ලිෂ් කරාට පස්සෙ මං ගැන ආරංචියක්වත් නැති උනොත් අහිංසක අපේ අම්මටයි තාත්තටයි මේක කියවපු උන් මේ ගැන කියපල්ලා.....සුදු වෑන් මට හීනෙන් නොපෙනේවා......!!!

____________________________________________________

                        Papaa Palace........!!

දකුණුලක තංගල්ල නගරයේ මැදකැටිය පාරේ සුන්දර වෙරළතීරයට ආසන්නව පසුගිය 16 වැනිදා අභිනවයෙන් ආරම්භ වූ හොටල් පපා පැලස් ආයතනයට මල් මල් අඩවියෙන් උණුසුම් සුභ පැතුම්.........!!!

ඔබට මෙහිදී ලබාගත හැකි සේවාවන් කිහිපයක්.....

1.RESTAURANT

2.GARDEN CAFE

3.BUSINESS CENTER

4.PARKING & TRANSPORT

5.SPA

6.FOOD

7.ROOMS

8.FREE WIFI

ඉදිරිපස දර්ශනය

සුන්දර වෙරළ තීරයට ආසන්නවම

නවීන පන්නයේ සම්භාෂණ ශාලාව

සුව පහසු ආරක්ෂිත නිදන කාමර

ප්‍රනීත සෞඛ්‍ය ආරක්ෂිත ආහාරපාන

ආයුර්වේද ස්පා

ඉදිරිපස දර්ශන

 වැඩිදුර විස්තර........

1.පපා පැලස් ෆේස් බුක් පිටුව https://www.facebook.com/tangallepapaapalacehotel

2.නිළ වෙබ් අඩවිය http://tangallepapaapalacehotel.com/

3.දුරකතන අංකය - +94472240046

සිතියමෙන්